Васіль ЗУЁНАК

Вялікая сініца

Казала ўсім сястрыцам:

– Хоць меншыя вы ростам,

Сябе паводзьце проста.

Як і ў мяне, у вас правы

Птушыныя і знакі.

“Вялікая…” – дык знайце вы:

Тут велічы ніякай.

Сініцы ж вы таксама,

Хоць розныя ў нас мамы.

Сямейства ў нас вялікае, –

Баюся збіцца з ліку я, –

Хто з намі пацягаецца:

Блакітніцы і гаічкі,

Чубатка грэнадзёрная,

Яшчэ маскоўка чорная…

Сямейка рознамоўная

Але адно галоўнае,

Чым можна ганарыцца:

Усе мы ёсць сініцы!..