ХТО ШТО ДЗЕ ЗБІРАЎ? 

Пад грушай Данута
Збірала грэйпфруты,
Глеб з Машай увішна —
Лімоны пад вішняй,
А персікі — Яна
Пад слівай старанна.
Знайшла апельсіны
Пад яблыняй Ліна.

З бярозы бананы
Здымала Святлана,
Арэхаў з асіны
Натрэсла Марына
І мех мандарынаў —
З асіны Карына.
Пад волатам-дубам.
Набрала груш Люба,
А Толя пад клёнам —
Кош поўны лімонаў.

Ці так было ўсё, ці не так —
Таго я не бачыў.
Аднак
Пра тое казаў мне Мікіта.
А можа, ён што і наблытаў?

ПА ТРАТУАРЫ І ШАШЫ

Па тратуары ехалі трамваі,
А дзеці беглі па шашы…

Што я наблытаў тут,
Калі ты знаеш,
Дык тое нам усім скажы.

ШТО НЕ ТАК?

У Альжбэты — тры канфеты.
Пяць канфетак ёсць у Светы.
Колькі ж усяго канфетак
Маюць Света і Альжбэта?

***

На сукеначцы ў Міланы
Два вялікія карманы.

Я, калі прызнацца, зрэшты,
Напісаў не тое нешта.

Хто з вас, дзеці, скажа першы,
Што не так у гэтых вершах?

Анатоль Зэкаў