Жук

Малюнкі Сяргея Волкава

Жук над Жодзіна дзень кружыць,
Жвавы жук, жыве, не тужыць
Сеў на жэрдку: — Як тут гожа!
Як жа Жодзіна прыгожа! 

Котка

Котка крочыць крохкім крокам
І за мышкай сочыць вокам.
Мышка ў норку знікла скокам
Котка — скок, захрасла бокам.

Лось

Лось вялікі заблукаў
Ва ўласным лесе.
Ветліва бусла спытаў,
Што ляцеў з Палесся.

Мілы бусел, пакажы
Шлях крылом дадому.
Бусел: — Кля! За мной бяжы!
Будзеш каля дому. 

Рыбак

Раз рыбак паехаў у Ракаў
Палавіць у рэчцы ракаў.
Ракі ў рэчцы той не жылі
Толькі тры фарэлі плылі.

Замест ракаў тры фарэлі
На яго з вядра глядзелі.
Хоць вярнуўся ён без ракаў,
Наш рыбак не вельмі плакаў.

Шыншыла

Пад шыпшынаю шыншыла
Шалік шоўкавы знайшла,
Упрыгожыла ім шыю
І да мышачкі пайшла.