Карагод месяцаў

Дзявяты месяц мае трыццаць дзён,
І для дзяцей усіх адметны ён.
Квітнее верас, ападае лісце долу,
Дзень ведаў настае, і мы ідзем у школу.
У рознакаляровы месяц года
Грыбамі нас адорвае прырода.
І верасню мы дзякаваць павінны
За россыпы брусніц і журавінаў.
І хутка ў лесе стане ціха-ціха,
Пакуль трымціць пад ветрам павуцінка.
Сыходзяць дні — ты не сумуй пра гэта,
Яшчэ сустрэнем “бабінае лета”.

Прыкметы і прымаўкі

Восень — на дзень пагод восем.
Восень спяшаецца — зіма не чакае.
Калі гром грыміць восенню, зіма не скора настане.

Віка Трэнас

Малюнак Наталлі Таўсталес