***
Мы з катом ідзём у краму.
Яйкі купім і смятану.
Малако, муку, кефір.
Мама зладзіць блінны пір!

***
Козлік, козлік,
Залатыя рожкі!
Падары мне, козлік,
Белыя панчошкі!
Цёплыя панчошкі,
Каб не мерзлі ножкі!

***
На сукенцы ёсць кішэнька,
А ў кішэньцы — карамелька.
А ў татавай кішэні,
Мабыць, поўна карамелі!

***
Я не буду сумаваць,
Буду ўсміхацца!
З сонечным праменьчыкам
За руку вітацца!

***
У мяне ёсць апельсін.
Я адна і ён адзін.
Ведаю яго хітрынкі —
схаваў долькі-апельсінкі.
Скурку хутка абяру я,
Маму з татам пачастую.

***
Коцік нешта не вуркоча
І гуляць са мной не хоча.
Сцішыўся ў куце за кветкай:
Ён палюе на катлетку!

Наталля Бучынская