Сунічкі

Каля поўнае крынічкі
Пахаваліся сунічкі
Пад сцяблінкі і лісты
I за ельнічак густы.

З раніцы да ночкі
Бомкаюць званочкі,
Галасочкам тонкім
Клічуць іх рамонкі.

Сяргей Грахоўскі

Бярозы, сосны, верасы

Бярозы, сосны, верасы,
Вятрам і сонцу даспадобы, —
Мае вы сімвалы красы,
Зямліцы роднае аздобы.

Алег Лойка

Добры дзень, лета!

Разнатраўе, разнаквецце,
Пчол гудзенне, медазбор,
Цёплы і ласкавы вецер,
Люстраная гладзь азёр.

Ранкам росным, сонца поўным
З вышыні нябёс удзень
Запяяў спявак цудоўны:
«Лета, лета, добры дзень!»

Якім Алоўкін