САЛАВЕЙ

Яшчэ не падаюць на дол

Фота Сяргея Зуёнка

Пялёсткі адцвітаць,
Вясна і ў сэрцы, і наўкол,
І ён у садзе навасёл, —

Як тут не заспяваць!..

ГАРЭЗА

А хто гэта, а хто там
Сваволіцца з чаротам?

То затрашчыць насмешліва,
То стоіцца нячутна,
То мільгане паспешліва
Паміж трысцінак гнуткіх:
Уверх і ўніз, а потым
Налева і направа…

Жыве — сабе ў ахвоту,
Чароту — на забаву.
Пагойдвае мятлушкі,
Як ветрык, лёгкім дотыкам…

А то — гарэза-птушка:
Вяртлявая чаротаўка.

Васіль Зуёнак