ЛІЧЫЛКА

Раз, два, тры, чатыры, пяць,
Шэсць, сем, восем, дзевяць…
Добра ў хованкі гуляць
Ад нядзелі да нядзелі.
На лік “дзесяць” разбяжыся,
Хто застаўся – той жмурыся!

ЧЫМ ШТО ЕСЦІ?

Хто з сяброў падкажа Мішку,

Малюнак Віталя Дударэнкі

Як патрэбна есці ўсё ж.
Чэрпае пюрэ ён лыжкай,
А відэльцам лезе ў боршч.

БАБЁР-ХВАЛЬКО

Бабёр хваліўся шчупаку,
Што можа пераплыць раку,
І так рупліва грыз ствол дуба,
Ажно стачыў дашчэнту зубы.

Сядзіць і войкае ў трысці:
Дзе стаматолага знайсці?

ЕЛА ЛЬВІЦА ПІЦУ

Ільвянят прывезла львіца
На экскурсію ў сталіцу.

У піцэрыі ў сталіцы
Заказала львіца піцу.

Ела піцу, смакавала
І львянятак частавала.

І цяпер штодня на піцу
Просяцца яны ў сталіцу.