Рыгор Барадулін

***
Бач,
Як навастрылі вушкі
Хуткамоўкі-балбатушкі.
І балбочуць, і якочуць.
Ці не збегчы з дому хочуць?

***
Міла мяла мяты пачак.
Мяў мядзведзь, як мякіш, мячык.

***
Чакала чайка чаянят.
Ручай чакаў ручаянят.
Чакалі чаяняты,
Пакуль ручаяняты
Памыюць ручаняты.

Алесь Емяльянаў-Шыловіч

***
Шчупак купіў на рынку шчотку,
Ад шчоткі ў шчупака пякотка.
Калючае шчацінне ў шчоткі —
Казыча шчупаковы шчокі.

***
Пчала аднойчы пчаляра
Чапляць знячэўку пачала,
Лухту пчала ўвесь час чаўпла.
Пчаляр бурчаў: «Вось чапяла!»