Займальныя вандроўкі па Беларусі

Мая Беларусь!
На тваім зялёна-блакітным мундзіры
безліч знакаў даўніны,
шмат прыкмет сённешняй явы.
Гісторыю ды геаграфію тваёй красы
можна чытаць, вывучаць
па незвычайных сімвалах —
гербах гарадоў, мястэчкаў, вёсак.
Найстаражытны знак мае Полацк,
патрыярх пасяленняў беларускіх.
На блакітным шчыце —
пад колер нябёсаў, крыніц, васількоў —
па срэбных хвалях
плыве трохмачтавы карабель.
Яго белыя ветразі надзьмуты,
яго сцягі, нібыта лілеі,
у высі нябеснай бялеюць.
І лёгка ўяўляецца,
як па задумлівай Заходняй Дзвіне,
па даўнейшым водным шляху
“ з варагаў у грэкі”,
з Балтыйскага ў Чорнае мора
плывуць і плывуць караблі.
Святы і мужны Полацк
вітае гасцей з усіх валасцей.
А ворагаў, захопнікаў, акупантаў
Полацк бязлітасна тапіў
у сваёй дзіва Дзвіне…
Гербы маёй Беларусі!
Убачце ў іх белую стралу
з нацягнутай цецівой.
Палюбуйцеся залатым зубрам
на фоне зубчатай крэпасці.
Узыйдзіце на абарончую вежу,
якая стагоддзямі стаіць на зялёным узгорку.
Праляціце з срэбным буслом,
які трымае ў залатой дзюбе
дубовую галінку з жалудамі.
Зазірніце на залатое сонца
з вокам Божага блаславення.
Кіньце свае думкі
на крылы залатога млына.
Памаліцеся разам з Святымі —
Архангелам Гаўрыілам, Апосталам Пятром,
Прачыстай Дзевай Марыяй
ды з Самім Ісусам Хрыстом…
Колькі ж знакавых сімвалаў
у беларускіх гербах!
За кожным з іх —
наша Душа, наша Вера,
Любоў да Богам дадзенай зямлі.
На ёй жылі нашы прашчуры.
Ёю цешымся мы.
Тут уздымаеце крылы вы,
нашы наступнікі.
Слава Беларусі ва ўсе вякі!

Уладзімір Ліпскі

Пачатак

Працяг