Рубрыка «Карагод месяцаў»

Малюнак Наталлі Таўсталес

На календары – адзінка.
За хвілінкаю – хвілінка.
Гэты месяц – дабрадзей,
Святам радуе людзей.
Месяц наш вядзе адлік
Да вясны і да адліг.
Шапка, шалік, рукавічкі.
Коле носік з непрывычкі,
Шчыпле шчокі нам мароз.
Новы год з сабой прынёс
Лыжы нам, канькі і санкі,
Цуд зімовай калыханкі.
Спаць у лесе мішка будзе,
І яго мы не пабудзім.
Ноч скароцім, дзень здабудзем.
А завецца месяц – студзень.

Віка ТРЭНАС

Прыкметы і прымаўкі

Студзень-сечань: сячэ зіму напалам.
Студзень імглісты – мокры год, студзень халодны – позняя вясна і даждлівае лета.
Дрэвы ў інеі – неба будзе сіняе.
Калядкі – добрыя святкі: бліны ды аладкі.
Калі ў ноч на калядную куццю (6 студзеня) многа зорак на небе, добры ўраджай чарніц будзе, а калі зоркі рэдкія, то і ягады будуць рэдка.