Дзіцячы сад

Раз зайшлі ў дзіцячы сад
Восем жоўтых куранят,
Прывяла іх з вулачкі
Шэранькая курачка.

Трапіла ты, курачка,
Не у тую вулачку:
Тут дзіцячы сад
Не для куранят.

Размалёўка
Брацік пабег гуляць.
Хто паможа Алінцы
Пчолку размаляваць
На вярбовай галінцы?

Уладзіслава Луцэвіч

Божы крыжык

Шлях круты, няблізкі,
Шлях у цэлы лёс –
Ад зямной калыскі
Да святых нябёс.

Крыжык светлы з храма
Мне прынесла мама,
Каб шчасліва рос –
Без грахоў і слёз.

І прыгожа доўжыць
Мой жыццёвы шлях
Падарунак Божы –
Крыжык на грудзях.

Мікола Маляўка