Аднойчы на дачы Маша і дзед  пачалі гуляць у школу. Маша – вучаніца. Дзед – настаўнік. Маша ўзяла сшытак, ручку, села за столік, які стаяў на вуліцы пад адкрытым небам, і тут да яе падышоў настаўнік:

– Напішы, Маша, літару А.

Маша хуценька намалявала зверху ўніз дзве ножкі, перакрэсліла іх рыскай, атрымалася А. Думала, ёй ужо за гэта будзе пастаўлена адзнака. Але настаўнік даў новае заданне:

– Цяпер, Маша, пахадзі па агародзе і адшукай, што там расце на літару А.

Маша ахвотна пабегла шукаць патрэбную літару А. Дарослыя – бабуля, мама, тата, брат Антон – цярпліва чакалі: з чым вернецца Маша?

Малюнак Віталя Дударэнкі

Праз колькі хвілін яна, радасная і вясёлая, ускочыла ў дворык, пачала выгукваць:

– Агрэст… Агуркі… Ажына… Алыча… Абляпіха… Астры…

Дзед-настаўнік пахваліў вучаніцу і аб’явіў:

– Маша, ты – выдатніца!

Вучаніца ўсміхнулася і тут жа прапанавала:

– Давайце, настаўнік, напішам цяпер літару Б.

– Я згодзен. Пішы.

Маша лёгка справілася і з гэтым заданнем. А як толькі напісала літару, паднялася з табурэціка і зноў знікла за жоўта-зялёным домікам. На гэты раз яна прынесла новыя адкрыцці. Аказваецца, на бабуліным агародзе растуць на літару Б – бульба, буракі, бручка, боб, буякі…

Настаўнік узнагародзіў сваю кемлівую вучаніцу падарункам:

– За літару Б, Маша, атрымлівай банан, булку.

Гульня вельмі спадабалася Машы. Яна адшукала ў агародзе на літару В – вішню і вінаград, на літару Г – гарбуз, гарох, грушу, на літару Д – дыню і дрэва-арэх…

На гэтым школьны ўрок і закончыўся. Маша стамілася. Не так проста вывучаць азбуку агарода. Яшчэ складаней яе вырошчваць.

А цяпер, сябры, усе, каму спадабалася Машына азбука, хто збіраецца ісці ў сапраўдную школу, атрымайце хатняе заданне. Паспрабуйце напісаць у сваім сшытку астатнія літары беларускага алфавіту. І прыгадайце агародныя, садовыя расліны, дрэвы на гэтыя літары.

Маша з дзедам таксама думаюць.

Уладзімір ЛІПСКІ