Юбілей

Ні многа, ні мала — семдзесят год
Працуе нястомна Белаўтазавод!
І можна дакладна сказаць без прыкрас:
Ты гонар наш — слаўны, вялікі БелАЗ!

БелАЗ 
Не Геркулес і не Атлант —
Велікагрузны ён гігант.
Па трыста тон бярэ за раз
Кар’ерны самазвал БелАЗ.

Велікан

Колькі ж здзіўлення было ў Антона,
Пабачыў калі самазвал мнагатонны.
Хлапчук на яго падзівіўся, ды й кажа:
«А колькі ж яму трэба з’есці той кашы?!»

Пагрузчык
Пясок, каменне, кучы друзу —
За дзень цягае столькі грузаў!
А гэта ж не арэхі  лушчыць —
Працуе велікан-пагрузчык!

Паліваарашальнік

Нібы жалезны жоўты слон —
У крэйдавых кар’ерах ён
Вады галоўны захавальнік —
БелАЗ-паліваарашальнік.

Падземны пагрузчык

На будоўлі тунэляў і ў шахтах
Ён трымае працоўную вахту,
Цягавіты і вельмі трывушчы
Да работы падземнай пагрузчык.

 Аэрадромны цягач

У кожнага свая работа,
Вось ён цягае самалёты —
Асілак, працаўнік нястомны,
Цягач аэрадромны.

 Электракар

Машына, як цацка з дзіцячай гульні, —
Малая ды спрытная, — толькі зірні!
Любому заводу патрэбна, як дар —
Трывалы, рухавы электракар.

Бульдозер

Думаў я: можа лепей у прозе
Расказаць, як працуе бульдозер?
Аж і рыфма сама на парозе.
Дык вось: наш бульдозер нічога не возіць,
Прыбірае ён друз на дарозе.

 Казік і Белазік

Казік любіць самазвалы,
У яго іх ёсць нямала.
Думаў бацька сына ўразіць
І купіў яму Белазік.

 Волат

Не самазвал, а цэлы дом —
Чатырыста з паловай тон!
Такіх — вы майце на прыкмеце —
Не знойдзеце па ўсёй планеце!

 БелАЗ для ўсіх

У БелАЗа машын незлічона —
Цягачы, самазвалы, вагоны.
А яшчэ выпускае ён плённа
Мэблю, цацкі, электрапрыборы,
Інструменты і трэнажоры.

Цягач-буксіроўшчык

Калі раптам вялізны БелАЗ
У кар’еры сур’ёзна заграз,
Небараку свой крук выратоўчы
Прапануе цягач-буксіроўшчык.

Рабочыя

Сярод гэтых гіганцкіх машын
Людзі дробныя, як мурашы,
Але робяць вялікую справу —
Пракрычым ім трохкратнае — брава!
Быць белазаўцам — гонар і слава!

Буся на БелАЗе

Буся зноў усіх уразіў —
Гэтым разам сябар наш
Быў з візітам на БелАЗе,
Вось пра гэта й рэпартаж!

Алесь ЕМЯЛЬЯНАЎ-ШЫЛОВІЧ