Тэатр Васі Вясёлкіна

Казка ў 1 акце

Асобы:
Дзіця, Баба-Яга, 1-е Ліха, 2-е Ліха, Ведзьмы.

З’ява 1

Лес. На сцэну ўваходзіць Дзіця з кошыкам ягад.

ДЗІЦЯ (кліча). Го-го-го! Вось блутаюся ды блутаюся па лесе, а дарогі да хаты не магу знайсці. Ужо сонейка зайшло… І есці хочацца і страх бярэ. (Хоча ўзяць ягадку з кошыка.) Не! Гэтыя ягадкі для мамы… (Азіраецца. Гукае.) Го-го-го!

З’ява 2

З’яўляецца Баба-Яга.

БАБА-ЯГА. Я гаспадыня гэтага лесу Баба-Яга! Ты чаго крычыш ды палохаеш маіх звяроў і птушак?

ДЗІЦЯ. Заблудзілася. Мо ты скажаш, кудой ісці?

БАБА-ЯГА (хітра). А ягадкі свае дасі? Я нічагусенькі не ела…

ДЗІЦЯ. Я іх збірала для хворай мамы, але калі галодная, дык бяры.

БАБА-ЯГА. Якая ты добрая!.. (Дае клубок.) Кінь яго на зямлю і скажы: “Клубочак! Каціся-каці, – мяне да хаты давядзі!” Ён пакоціцца, а ты ідзі за ім. Толькі памятай: нікуды не аглядайся, нічога не палохайся, ды не спускай вачэй з клубочка, бо іначай ён ад цябе ўцячэ, а ты зноў заблудзішся, і тады ўжо я цябе з’ем! (Знікае.)

З’ява 3

ДЗІЦЯ. Трэба хутчэй уцякаць і зрабіць так, як сказала Баба-Яга. (Кідае клубочак, кажа чароўныя словы, ён коціцца. Ідзе за ім.)

 З’ява 4

Два Ліхі забягаюць з розных бакоў.

1-е ЛІХА. Чуў?

2-е ЛІХА. Але!

1-е ЛІХА. Трэба клубок адабраць!

2-е ЛІХА. Напалохаць дзіця!

1-е ЛІХА. Я вагністай куляй дарогу перабягу.

2-е ЛІХА. Я вялізнай жабай выскачу з кустоў.

Выбягаюць. Чуваць свіст кулі, кваканне жабы, дзіцячыя крыкі.

 З’ява 5

ДЗІЦЯ. Раптам страхі пачаліся… Я вочы толькі на секунду заплюшчыла, а клубочак і знік!

Падкрадваецца Баба-Яга і хапае Дзіця.

БАБА-ЯГА. Не паслухалася! Ну, цяпер блага табе будзе! Гэй, ведзьмы! Распаліце агонь у маёй хатцы на курынай лапцы. Зараз, дзетачка, мы цябе есці будзем! А пакуль агонь разгарыцца, пасядзі ў склепіку.

ДЗІЦЯ. Пусці! Не еш!

Выходзяць.

 З’ява 6

З’яўляюцца два Ліхі.

1-е ЛІХА. Чуў?

2-е ЛІХА. Але.

1-е ЛІХА. У складзік ведзьма зачыніла.

2-е ЛІХА. Там Дзіцю будзе смерць-магіла.

1-е ЛІХА. Трэба на злосць ведзьме зрабіць!

2-е ЛІХА. Трэба Дзіця выпусціць!

 З’ява 7

Ліхі падкрадваюцца да склепіка, адмыкаюць яго.

1-е і 2-е ЛІХА. Гэй, Дзіця!

ДЗІЦЯ. Ратуйце!

1-е ЛІХА. Вось маеш попелу з-пад агню купальскага. (Дае  мяшэчак.)

2-е ЛІХА. Баба-Яга з іншымі ведзьмамі будзе гнацца за табой…

1-е ЛІХА. І як толькі дагоніць…

2-е ЛІХА. …хапай попел і ў вочы ёй, у вочы!

1-е ЛІХА. Яна аслепне і разляціцца па лесе, як асеннія лісты, калі іх сівер кружыць!..

 З’ява 8

Пагоня.

БАБА-ЯГА. Гэй, ведзьмы-сястрыцы, трымайце, хапайце!

ДЗІЦЯ. А вось табе, паганая ведзьма! (Сыпле попелам у вочы Бабе-Язе. Тая закрычала, зарохкала, закукарэкала.) Круціся цяпер тут, як сухое лісце, калі сівер загудзе! А я да мамы!..     

Францішак АЛЯХНОВІЧ
1917 г.