Ледзь уцёк

Ля кустоў Пятрусь ішоў,
Зачапіўся за сучок –
Ледзьве вырваўся, уцёк.
– За кашулю воўк трымаў:
Паглядзіце, як парваў…

Мяч-хвалько

Мяч падскочыў вышэй дому:
– Не падскочыць так нікому!
Не сказаў нічога Жэня,
А паклаў яго ў кішэню.

Гэта я намаляваў

Галава – як у вала,
Крылы – быццам у арла,
Ногі – нібы ў таго зайца…
Што такое – адгадайце!
Лепш не думайце дарма,
Бо такіх звяроў няма.
Гэта я намаляваў –
Свайго братку напужаў.