Рыгор БАРАДУЛІН
Закончыліся ў рэчкі
З марозам лютым спрэчкі.
Шумлівай чарадой на лёд
Малыя пачалі налёт.

Ніна ГАЛІНОЎСКАЯ

Малюнак Аксаны Аракчэевай

Гэй, канькі-ледавікі,
Не хіліцеся ў бакі!
Вось звяжу вас матузком –
Бегчы будзеце радком!

Зміцер ТУГАЙ
Зноў зіма без памяла
Гурбы снегу намяла.
Футру зайцу памяняла,
А мядзведзя спаць паклала.

Іван МУРАВЕЙКА
Каця прахапілася:
– Яшчэ ноч? – здзівілася. –
Не хачу быць сонненькай,
Уключыце сонейка!..

Пятро СУШКО
На палянцы на лясной
Ёсць майстэрня пад сасной.
Там вавёрка-працаўніца
Спрытна вяжа рукавіцы –
Цёплыя, зімовыя, рознакаляровыя.

Юрась СВІРКА
Куды ні глянешь – снег і снег,
Ад сонца ён іскрыцца.
Тут бачна: заяц полем бег,
А там, дзе гай, – лісіца.