Снегіры, сінічкі!
Сыплю вам пшанічкі,
Крупак, крошак хлеба,
Вам жа мала трэба!

Ешце, любыя сябры!
Не ляціце ў бары,
А жывіце ў двары
Да вясновае пары.

Вось для вас кармушкі,
Птушкі-шчабятушкі,
Нашы весялушкі!

Станіслаў ШУШКЕВІЧ

Станіслаў ШУШКЕВІЧ (19 лютага 1908 – 1 лютага 1991) – выдатны беларускі пісьменнік. Аўтар дзівосных твораў для дзяцей. Маленькія чытачы непадманна любілі яго вершы і з нецярпеннем чакалі кожнай новай публікацыі і кніжкі. “Дарослыя сваёй нервовасцю, хітрасцю і двудушнасцю часта мяне расчароўваюць, калі ж пішу для дзяцей, размаўляю з імі, гуляю, то адпачываю душой і целам”, – любіў казаць Станіслаў Шушкевіч.