***
Лось набыў сабе раяль
І ў бары наладзіў баль.

Малюнак Наталлі Смародзіны

Весяліліся звяры
Аж да раніцы ў бары.

***
У рацэ своволіў шпак,
А ў шпакоўні спаў шчупак.
Хто з іх спаў, а хто своволіў,
Разабраць не можа Воля.
Што шчупак рабіў, што шпак?
А ці ўсё тут, зрэшты, так?
***
Сена бегла за каровай.
Конь ляцеў услед за возам,
З неба сыпаліся дровы,
І трава кляпала косы.

***
Груш з вярбы натрос
Цэлы мех Вадзім.
Плыў па рэчы воз,
Конь сядзеў на ім.

***
У шпакоўню крот
Да баброў залез,
З дому выбег бот
І пабег у лес.

***
За ўюном шчупак
Гнаўся па сасне…
Адкажыце: так
Можа быць ці не?

Анатоль ЗЭКАЎ