Міхась ЗАЛЕСКІ

Сынава просьба

– Мама, купі мне чырвонага чарніла, – папрасіў сын.
– Навошта табе яно? Хіба чырвоным чарнілам у школе пішуць?
– Буду двойкі выпраўляць. Настаўніца сказала, каб за пяць дзён ніводнай двойкі не было.
(№ 11, 1964)

Міхась ЗАСТОЛЬСКІ

– Васілёк, чаму ў цябе рукі брудныя?
– Я імі твар мыў.
(№ 12, 1984)

Максім ЛУЖАНІН

Снег

Вось заладзілі дажджы,
Сеў і з хаты не бяжы.

Толькі вечарам учора
Падмярзаць стаў панадворак,

Хмары некуды сплылі,
Зоры ў небе зацвілі…

А пасля ўсхадзіўся вецер,
Выў у коміне ўвесь вечар.

Так я з гэтым і заснуў,
А на ранне, як зірнуў, –

Вось, здаецца б, і пабег:
Белы,
Белы,
Белы
Снег.

(№ 11, 1984)