У грыбах

Ад расы верасы пасівелі.
А ў бары галасы зазвінелі.
Баравік не прывык лезці ў вочы.
Адшукае грыбнік, як ахвочы.

Бегемот і малпы

МАЛПЫ (Бегемоту).

Зноў залёг у глей на дно,
Як гнілое бервяно!
Мы ж прачнуліся ўсе рана,
Каб гайдацца на ліянах.

БЕГЕМОТ (малпам).

Вам бы толькі гулі-ўцехі.
Прэч адсюль! Эх, пустасмехі!

Калыханка для кацянят

Ноч прыйшла, і ціха стала.
Кошка дзетак спаць паклала
І спявала: “Кацяняты,
Ходзіць дзядзька-сон ля хаты,
Хто хутчэй засне ў зацішку,
Той у сне ўбачыць мышку,
А нясплюху-небараку
Напалохае сабака”.
Кошка, спеўшы калыханку,
Дрэмле з дзеткамі да ранку.