ГРУШЫ
Дождж ліе… Лістота груш
Зноў прымае цёплы душ.
У галлі даспелі грушы.
Не адцягнеш і за вушы!

ВІШНІ
Каля хаты ў садзе вішня.
Ад цяжару крона вісне.
Нахілілася яна –
Вішні рві-каштуй з акна!

ЯБЛЫНЯ
Днём ранет ружовашчокі
Пазірае на аблокі,
Хоча ў неба паімчацца –
На аблоках пагушкацца!

СЛІВЫ
Надкусіў і скіснуў крыва:
Не ўзялася ў слодыч сліва!
Недаспелая кіслючка –
Толькі выплюнуць, о злючка!

ВІНАГРАД
Вінаград раскінуў плёткі,
На сцяну забраўся ўсё-ткі.
Зараз можна ў лісці
Гронкі сінія знайсці.

ПЕРСІК
Ганарлівец знатны персік
Ў жніўным сонцы бок свой песціць.
Так імкнецца ён паспець
Між чужачак-сліў даспець.

АЛЫЧА
У суседа Махнача
Пахне мёдам алыча,
І на дол сыры ўначы
Ўпала процьма алычы.

МАЛІНЫ
Сціх паблізу гуд пчаліны.
Ззяюць зоркамі маліны.
Адхіні лісток драпучы –
Солад зведаеш смакучы!

АГРЭСТ
Куст раскідзісты – агрэст –
Найкалючы мае змест.
Трэба добра пастарацца,
Каб да ягадкі дабрацца.

ГАРБУЗ
Пад лістом, як парасонам,
Падрастаў гарбуз зялёны.
Стаў ён жоўты і пузаты –
На гарбузікі багаты.

КАПУСТА
У лісты-закруткі з густам
Апранулася капуста.
Толькі нож увішнай бабкі
Распрануў яе да храпкі.

ЦЫБУЛЯ
На гарачым палкім сонцы
Касмачы цыбулі сохнуць,
Каб хвастатыя галоўкі
У вянок звіліся лоўка.

МОРКВА
У зямлю схаванай мокла
Ад вясны самое морква.
А цяпер – цягні за грыву,
Хрумстай соладка, шчаслівы.

ПАМІДОРЫ
На градзе, уздоўж разоры,
Уссядаюць памідоры –
Жоўтыя, чырвоныя,
Чорныя, зялёныя.

БУСЯ НА АГАРОДЗЕ

Зноў падаўся з хаты Буся:
– Нагляджуся! Надзіўлюся!
Да грады паспешны крок.
Умінае агурок!

Вершы Міколы МЯТЛІЦКАГА