Тадзіяна КЛЯШТОРНАЯ
Ветлівыя словы

КАЛІ ЛАСКА, ДЗЯКУЙ,
ДОБРЫ ДЗЕНЬ –
Ветлівыя словы
Чую ад людзей.
Я таксама буду
Імі даражыць:
З ветлівымі словамі
Лёгка жыць.

Іван ГУРБАН
Цюльпан

У гародчыку цюльпан
Напарфуміўся, як пан.
Рады сам сваёй красе,
Добры нам настрой нясе.

Яўген МІКЛАШЭЎСКІ
Улетку

Тут у садзе ды гародзе
Добра пры любой пагодзе.
Толькі сонца прыпячэ –
Я кажу: “Давай яшчэ!”
І шторанку загараю.
Загараць і вам я раю.

Янусь МАЛЕЦ
Верабейчык

– Чык-чырык! Чык-чырык! –
Верабейкаў чую крык.
Кінуў хлеба я акрайчык:
– Еш, маленькі паскакайчык!

Павел МАРЦІНОВІЧ

На сонейку
Высозны бор
наскрозь прагрэў
свой вечны ўбор.

Авяр’ян ДЗЕРУЖЫНСКІ
Піліпка і ліпка

Паліваў Піліпка
Ліпку.
Ліпка дзякавала
Піліпку
І шаптала
Веццем:
– Хораша
На свеце!