Кандрат КРАПІВА
Бабкі

Малюнкі Анастасіі Гарбуновай

Розных бабак шмат на свеце.
Тры з іх добра я прыкмеціў:
Біў адну я малатком,
Еў другую з малаком,
А трэцяя бабка –
Карэньчык ды шапка.

Анатоль ЗЭКАЎ
У Надзейкі зуб баліць ­–
То ж такое горачка.
Мо арэшак раскусіць
Папрасіць вавёрачку?

Васіль ЗУЁНАК
Што за акно?

Чарадзейнае акно:
То канцэрты, то кіно,
То вясёлыя сюрпрызы, –
Адкрывае…

Алесь КАМАРОЎСКІ
Гульня

Брат кажа сястрычцы:
– Давай гуляць у заапарк.
– А як?
– Слухай: я малпай буду, а ты прынясеш мне бананы.

Леанід ДАЙНЕКА
Адвароткі

Не сядзі, раскрыўшы рот,
А чытай наадварот.
Што за звон? Што за шум?
Гэта лётаюць іхум.
Будзеш панам і тузом,
Калі маеш мудры гзом.
Не, не змог бы я без вас
Нават дзень пражыць, ырбяс.
Робіць шмат карысных прац
Галасісты наш кінгяц.
Я ад сораму гару,
Як не вывучу кору.
Выбіваўся зайчык з сіл,
Гналася за ім асіл.
Дык шануйце край свой, хлеб,
Суралеб, аксуралеб!

Уладзімір МАЗГО
Шарады

Якія трэба
Ўзяць дзве ноты,
Каб атрымаць
У суме потым,
Нібы мелодыю нябёс,
Сінонім
Слову “лёс”? (до+ля)
Займеннік
Плюс час сутак –
І атрымаеш хутка
Замест адказу
Адзінку часу. (Ты+дзень)
Слова-дрэва –
Першы склад.
Слова-кіпень –
Акурат
Гэта будзе
Склад другі.
Іх складзі,
Мой дарагі, –
Атрымаюць
вучні

Першы свой
Падручнік. (Бук+вар)

Валерый ГРЫБ

Верабейка сеў ля хаты
Ды з катом пусціўся ў жарты:
– Чык-чырык,
Чык-чырык, –
Я баяцца не прывык!..

Уцякае ад ката
Верабейка
Без хваста.

Уладзімір Мацвеенка
Загадка

Ля варот
Чатыры кошкі –
Вунь, катаюцца
Клубком.
Палічы
У кошак ножкі,
А пасля
Падумай трошкі,
Праз якія дзверы
Кошкі
Забягуць хутчэй
У дом?

(У кошак не ножкі, а лапкі. У чатырох кошак – 16 лапак. У дом забягуць праз адчыненыя дзверы.)