У гэтым месяцы любімаму часопісу беларускіх дзетак “Вясёлцы” – 60 гадоў. “Буся” далучаецца да святкавання!
Сонечнасці! Радасці! Заўсёднай вясны!

Мікола ХВЕДАРОВІЧ
Красавік

На мокрых вербалозах
Гракоў вясёлы крык.
Без ветру і марозу
Прыходзіць красавік.

Пятро ПРЫХОДЗЬКА
Вясна

Няма, відаць, у цэлым свеце
Пары святлейшай ад вясны.
Усюды вее свежы вецер,
Зямныя абуджае сны.

Адам РУСАК
Птушыны хор

У птушыным зводным хоры –
Пералівы,
Пераборы!
Так пяе птушыны хор,
Аж звініць зарэчны бор!

Авяр’ян ДЗЕРУЖЫНСКІ
Сонейка

Сонейка стамілася,
За лясок скацілася,
Спачываць прылегла ціха
Побач з шэраю зайчыхай.

Таццяна МУШЫНСКАЯ
Сінічка

Жвавая сінічка
Пад маім акном
Ценькае гарэзна,
Скача зноў і зноў.

І спявае птушка,
І звініць ручай,
Што вясна ўжо блізка, –
Дык выходзь, страчай!

Малюнак Кацярыны Білан