Беларускія краявіды 

Беларускія
Краявіды…
Перазвоны
Азёр і бароў,
Над палеткамі
Бульбы і жыта –
Песня
Велічных курганоў.
Гэта наша
Зямля дарагая,
Гэта нашы
Лугі і палі,
Над якімі
Спрадвеку лунае
Бусел –
Сімвал
Бяссмерця
Зямлі.

Анатоль Грачанікаў

Мір і шчасце 

Мір і шчасце нам з табою
Даў не з казкі чараўнік.
Родны край наш –
Мужны воін
І сумленны працаўнік.

Ні віхуры, ні навалы
Нас адолець не змаглі.
Родны край –
Зямля Купалы.
І мілей няма зямлі.

Нам не вечна быць малымі.
Дзень за днём бяжыць жыццё.
Родны край наш!
Мы тваімі
Абаронцамі расцём.

Леанід Пранчак

Наша Армія

Каб ты штодзённа
Мог за партаю
Адольваць ведаў рубяжы,
Стаіць заўжды
Надзейнай вартаю
Наш пагранічнік
На мяжы.

І ясным днём,
І ноччу хмарнаю,
Падрыхтаваная як след,
Трымае зброю
Наша Армія,
Каб новых войн
Не ведаў свет.

Артур Вольскі