Усё жыццё  чалавек праводзiць  сярод  iншых людзей,  у  супрацоўнiцтве  з  iмi.  Чалавек  i  прырода,  чалавек  i  яго  здароўе,  чалавек  i людзi навокал… «Вясёлка» дапамагае пашыраць кругагляд чытачоў  i заахвочвае iх назiральнасць, цiкаўнасць i глыбокiя веды пра навакольнае асяроддзе. Для гэтага трэба не прапусцiць вершы, казкi, апавяданнi пра жывёльны i раслiнны свет, арганiзм  чалавека, жыццё ў грамадстве i дапамагчы дзецям адчуць iх мастацкую i агульначалавечую вартасць.

Уладзiмiр  Лiпскi  «Загадкавы  чалавечак.  Маленькая  аповесць пра вялiкiя тайны» (урывак)

Як Антонiк-Понiк маляваў чалавечка

Антонiк-Понiк чырвоным алоўкам намаляваў кружок.

Галава!

У кружку паставiў дзве кропкi.

Вочы!

Нiжэй кропак –  маленькi кружочак…

Нос!

Пад iм –  кароткую рыску.

Рот!

З двух бакоў кружка –  кручкi.

Вушы!

Зверху кружка –  iголкi. Валасы!

Знiзу –  палачку.

Шыя!

Пад ёй –  новы кружок.

Жывот!

З бакоў –  вiлы.

Рукi!

Унiзе –  два кiёчкi.

Ногi!

Каго намаляваў Антонiк-Понiк?

Чалавечка!

Мова жэстаў

Антонiк-Понiк разам з дзедам асвойвае беларускую мову, а з ёй  i мову жэстаў. Адгадайце, пра што жэсты Антонiка-Понiка?

• Калi мама iдзе на працу, ён махае ёй рукой.
• Калi яму нешта падабаецца, ён падымае ўгору вялiкi палец.
• Калi сумняваецца, пацiскае плячыма.
• Калi сустрэне салдата, прыкладвае далоньку да скронi.
• Калi  ў  дзетсадзе  хоча  што-небудзь  спытаць  у  выхавальнiцы, падымае над галавой руку.
• Калi  мама  кладзе  меншую  сястрычку  спаць,  бяжыць  да  бацькi  i прыстаўляе ўказальны палец да губ.
• Калi нешта вельмi падабаецца, пляскае ў далонi…

Кожны з вас, сябры, карыстаецца мовай жэстаў. А можа, яна ў вас не такая, як у Антонiка-Понiка?

Разам  з  аўтарам,  Уладзiмiрам  Лiпскiм,  i  яго  героем  Антонiкам-Понiкам чытачы ў прыдумках i гульнях, пройдуць кароткi курс анатомii чалавека. А кожны раздзел гэтага незвычайнага «курса» заканчваецца заданнем, выкананне якога папаўняе моўны запас, развiвае кемлiвасць, вучыць вобразна глядзець на будзённыя з’явы i рэчы ў жыццi. Шмат вершаў, казак, апавяданняў знойдуць дзецi, рыхтуючыся да ўрокаў па курсе «Чалавек i свет» на старонках «Вясёлкi».