Высакародны Леў

У прыродзе ёсць незвычайна прыгожы час, які выпраменьвае энергію, час спеласці прыроды. Даспявае збожжа і садавіна, у разгары збор брусніц і ажын. А грыбоў можна адшукаць нават болей, чым увосень. Смачны і цікавы час. І людзі, народжаныя з 23 ліпеня па 23 жніўня, таксама маюць незвычайныя якасці характару: у іх вялікая жыццёвая моц і неверагодная актыўнасць. Яны – Львы, яскравыя і высакародныя, шчодрыя і ўзвышаныя, сумленныя і верныя, незалежныя і адважныя. Кім бы Львы не працавалі, яны адчуваюць сябе на троне. А калі яны – пісьменнікі, дык энергію выпраменьваюць і іх творы. Дастаткова прачытаць кнігі народнага паэта Беларусі Пімена Панчанкі, дзень народзінаў якога прыпадае на 23 жніўня, і народнага пісьменніка Беларусі Янкі Брыля, які нарадзіўся 4 жніўня. У гэты час прыйшла ў свет і Львіца Ларыса Геніюш, якая стварыла цудоўныя казкі і вершы не толькі для Львоў, але і для ўсіх дзяцей. Пераканаўчы прыклад Льва – Ігнат Дамейка, народжаны 31 ліпеня ў Карэліцкім раёне Гродзенскай вобласці. Ён правёў большую частку жыцця ў Чылі і ў той самы час займае важнае месца ў навуцы і культуры Беларусі, Літвы, Польшчы. Ігнат Дамейка – удзельнік паўстання 1830 – 1831 гадоў у Беларусі. Яму прысвоена званне Нацыянальнага героя Чылі, у Санцьяга ўстаноўлены помнік. Імем нашага земляка названы ўніверсітэт, горны хрыбет, мінерал дамейкіт, чылійскі аманіт, род дыназаўраў… Як не захапіцца такім Львом! Ды і астатнімі Львамі, дэвіз якіх – “Я жадаю, я загадваю”. Яны здольныя спыніць і напоўніць цябе энергіяй. Як, да прыкладу, Ігар Лучанок, народжаны 6 жніўня. Гэта мелодыю яго “Песні пра Мінск” адбіваюць кожную гадзіну куранты на вежы Мінскай ратушы.

Львы высакародныя,

Шчодрыя і годныя,

Няхай жыццё вам будзе тронам,

А вы для іншых – эталонам.

Аксана Спрынчан