У паэтычных зборніках Ніны Галіноўскай паяднаны гісторыя і сучаснасць, з любоўю апета наша Бацькаўшчына, цешаць усе поры года – з нябеснай зоркаю і зямным светлячком, з вясёлкавымі колерамі і чароўнай музыкаю лесу, поля і лугу, рэчак і крынічак. Людзі, звяры і птушкі, дрэвы, расліны і кветкі, кожны матылёк і мурашык – жывыя, яскравыя і адметныя, нібыта перанесеныя на паперу акварэльнымі фарбамі. Казка і ява пераплятаюцца і прыцягваюць увагу юных чытачоў, іх бацькоў і настаўнікаў. За кніжку “Клубок і Калабок” паэтэса ўшанавана Літаратурнай прэміяй імя Янкі Маўра.
Нарадзілася Ніна Васільеўна Галіноўская на Шклоўшчыне, у вёсцы Малыя Лазіцы, у сялянскай сям’і. Рана засталася без бацькі: ён, франтавік, не вярнуўся з вайны. З маленства палюбіла народныя казкі і песні, якія расказвала і спявала ёй маці. Скончыла Магілёўскае дашкольнае педвучылішча, працавала ў дзіцячым садзе, дзетдоме. І сама пачала пісаць вершы, казкі, песні для дзяцей.
Яе кніжкі – “Давайце пазнаёмімся”, “Размова сняжынак”, “Мой дзень”, “Зай прагназіст”, “Незвычайны карагод”, “Восень едзе ў магазін”, “Гусіны капялюш”, “Камп’ютарныя сакрэты”, “Палёт з Карлсанам”. Сур’ёзныя і вясёлыя творы, сабраныя ў гэтых і іншых кніжках Ніны Галіноўскай, пашыраюць кругагляд чытачоў, узбагачаюць пачуцці, вучаць думаць і самім знаходзіць адказы на многія пытанні, пастаўленыя жыццём.
Ніна Васільеўна даўні і верны сябар “Вясёлкі”, член рэдкалегіі нашага часопіса, часта выступае на літаратурных святах у школах і дзіцячых садах. За творы, надрукаваныя на старонках часопіса, яна адзначана прэміяй імя Васіля Віткі.

Мікола МАЛЯЎКА