Артур ВОЛЬСКІ

Пагоня

А чые там дзіва-коні
Абганяюць час?
Гэта едзе ў ззянні-звоне
Сонейка да нас.

Віктар ШЫМУК

Зіма вясной
Дзяўчынка прыдумала гэта сама,
Як снег над зямлёй закружыўся:
– На ўзлёце вясны пачалася зіма,
І снег ад вясны засвяціўся.

Мар’ян ДУКСА

Трава зелянее

Нядаўна шумелі вятры і завеі,
Сцюдзёнаю гурбай ляжалі снягі.
Зірніце навокал: трава зелянее,
І сцеле вясна аксаміт на лугі.

Міхась ВАЛЬКО

Хутчэй бы ў школу

Задаюць пытанні дзеці –
Ім цікава ўсё на свеце:
Чаму сонейка пячэ?
Адкуль ручаёк цячэ?
Куды воблачка плыве?
Дзе зімою рак жыве?..
Кажа дзецям дзед Мікола:
– Вам пра ўсё раскажа школа.