Уладзімір Ліпскі

 

 

 

 

 

 

НАЦЫЯНАЛЬНЫ ПАРК “ПРЫПЯЦКІ” —

дзіва беларускага Палесся,

старажытны кут прыроды Беларусі.

Яго плошча — звыш 88 тысяч гектараў.

 

 

 

 

 

 

 

 

 

Вачыма не акінуць.

Нагамі не прайсці.

Машынай не праехаць.

Палова Парка —

балоты, балотныя лясы, кустоўе,

звыш 500 азёраў, сотні рэчачак.

А пасярод усяе гэтай красы

задумліва нясе свае воды

велічная і нястомная Прыпяць.

У Парку вольна адчуваюць сябе

зубры, алені, ласі, казулі, дзікі…

У водах весела плюхаюцца рыбы.

У лясах, на лугах нязмоўкла

гучыць птушыны аркестр.

Пералётныя выраі тут адпачываюць,

кормяцца, набіраюцца сіл.

У Парку можна ўбачыць розных жыльцоў

на экалагічных сцежках

“Лясное возера”, “Цар-дуб”, “Цар-сасна”,

“Пойма Прыпяці”, “Гняздо арлана”…

Не прапусціце “Сафары-парк”,

у якім вольна жывуць лясныя звяры.

Пабывайце ў Музеі Прыроды.

Незвычайны цягнічок правязе вас

да Падворка Дзеда Мароза.

А калі захочаце палюбавацца Прыпяццю,

садзіцеся на цеплаходы

“Кірыла Тураўскі”, “Зубр”, “Лось” —

і вы ўбачыце жывую казку.

Ахоўны прыродны Парк “Прыпяцкі” —

наша Айчына.

Палюбім яе і навучымся ганарыцца ёю.

Легенда Палесся

            Цэнтр Парка “Прыпяцкі” — вёска Ляскавічы. Яна з даўніх-даўніх часоў красуецца на беразе ракі Прыпяць. Але такой прыгожай, дабротнай, як цяпер, яна яшчэ не была. І называецца — аграгарадок. Уяўляеце, з гадамі паселішча не старэе, а маладзее. Цуд нашай явы! Тут ёсць Музей Прыроды, гасцініца з басейнам, сучасная школа, будынак адміністрацыі Парка, дабротныя дамы, царква, прыстань, падворак Дзеда Мароза. Амаль на кожным электраслупе жывуць буслы. Генеральны дырэктар Парка  Сцяпан Мікалаевіч Бамбіза стварыў з сваіх дзівосных здымкаў прыроды ўнікальную кнігу “Маё Палессе”. Па яго ініцыятыве ў роднай вёсцы Ляскавічы праходзяць Міжнародныя фестывалі народнай культуры “Кліч Палесся”. З усіх куткоў свету едуць у “Прыпяцкі” турысты. Вашу сям’ю чакаюць там гасцінныя людзі і райская прырода.

 

 

Дамашнія заданні

1. Якія яшчэ Нацыянальныя паркі ёсць у Беларусі? Якія нашы Запаведнікі, Заказнікі, Пушчы ведаеце? Для чаго мы беражэм і ахоўваем іх?
2. Парк “Прыпяцкі” размешчаны на тэрыторыях Жыткавіцкага, Лельчыцкага, Петрыкаўскага раёнаў. У якой вобласці нашай краіны яны знаходзяцца?
3. Вы ведаеце, што лес, у якім растуць адны дубы, называецца дубрава. А што такое пойменная дубрава?
4. У “Прыпяцкім” жывуць 256 відаў птушак. Якіх вы сустракалі?
5. Ад Мінска да цэнтра Парка “Прыпяцкі” Ляскавіч — 260 км. За колькі часу можна зайсці туды, даехаць на кані, на машыне, заляцець на верталёце?

За цікавыя і змястоўныя адказы дырэкцыя Парка запросіць пераможцаў на экскурсію.