Па-суседску два гнязды —
Па-суседску два дразды:
Чорны дрозд
І дрозд рабіннік, —
У адной жывуць сябрыне.

Знае лес увесь наскрозь:
Чорны — чорны ён і ёсць,
А сусед рабіннік —
Грудкі ў рабацінні.

Чорны дрозд —
Амаль як шпак,
І спяваць
Такі ж мастак!

А рабіннік на рабінах
Лічыць гронкі безупынна,
Аж траскоча, не да песень, —
Бач, рабіны колькі ў лесе!
Зранку ягады смакуе:
Ураджайны год святкуе!

Васіль Зуёнак