Заснула лета ў стозе

Паклікаў пагуляць
Вясёлы перапынак,
Страсаю іней я
З бярозавых галінак.

Даўно няма дажджу,
Заснула лета ў стозе,
Засыпаў снег, гляджу,
Буслянку на бярозе.

Пад вокнамі сумёт
Ад нашых ног паменшаў,
Травінка ўмерзла ў лёд,
Як залаты праменчык.

Маркоціцца не час,
Душа званком сагрэта,
І мы назад у клас,
Спяшаемся да лета.

Я – беларус маленькі

Я – беларус маленькі.
Дарос ужо да школы,
Як і бацькі сумленны,
Руплівы і вясёлы.

Я – беларус маленькі
З блакітнымі вачыма.
Хачу і я, каб лепей
Жыла мая Радзіма.