Добры конік

У мяне ёсць конь драўляны,
Ён вясёлы і рахманы,
Цэлы дзень дзяцей ён возіць…
І зусім аўса не просіць!

Злы індык

Паглядзець рашыў Ягорка,
Хто ў бабулі на падворку.
Дзве казы, парсюк, пяць гусак,
Курак сем…
– Ой-ой, баюся!..
На падворку – тлум і крык:
Хлапчука прагнаў індык.

Пакатаўся

На свінні катаўся Гена,
Лужа Гену – па калена.
Не ўтрымаўся ён і ўпаў –
Мараком адразу стаў!

Страшная казачка

Хлопчык Пеця
З’еў мядзведзя,
А Гаўрыла – кракадзіла,
А Мікола – парася…
Вось і казачка уся!

Вясёлы пеўнік

Прачнуўся пеўнік раніцой,
Здзёўб зорку і запіў расой.
На вёску ўсю пачаў спяваць:
“Ку-ка-рэ-ку! Пара ўставаць!”