Прамень мільгнуў,
Як шабляй, над папарам –
І сігануў наўцёкі праз палі…
А ўжо мяне, мяне заспела хмара –
І грымнуў гром, і ліўнем дождж паліў.
Сцяна вады сцяну цягнула цугам…
Калі ж патоп той шумны адшугаў, –
Свой мост вясёлка выгнула над лугам,
Над хараством нявытаптаных траў.

Алесь БАЧЫЛА
1976 г.

Алесь БАЧЫЛА (2 сакавіка 1918 – 4 студзеня 1983) – выдатны беларускі паэт. Прайшоў усю вайну. Яго творчасцю захапляліся Максім Танк і Янка Брыль. Аўтар па-сапраўднаму народнага верша “Радзіма мая дарагая”, які стаў вельмі папулярнай песняй. Аўтар зборнікаў паэзіі “Шляхі” (1947), “Зоры вясеннія” (1954), “Юнацтва” (1959), “Дарыце цюльпаны” (1966), “Гараць лісты кляновыя” (1981).

Малюнак Віталя Дударэнкі