Мілаван ВІТЭЗАВІЧ

Храбрэц з капусты

Гэй, касы, куды бяжыш?
Можа, у вандроўку?
“З храбрацамі ў лес пайду –
Папалохаць воўка!”

Ты чаму ў капусту ўлез?
Тут хіба сталоўка?
“А цяпер другі расклад –
Уцяклі ад воўка!”

Душан РАДАВІЧ

Страшны леў 

Жыў калісьці
Леў адзін –
Жах і жудасць
Тых мясцін.

Страшна? Страшна!

Еў ён –
Толькі падавай –
Воблакі, траву,
Трамвай.

Страшна? Страшна!

Чыкільгаў
На трох нагах,
Наганяў усюды
Страх.

Страшна? Страшна!

А яшчэ (скажу цішэй)
Меў ён трое вушэй,
Меў ён трое вачэй,
Грозна слухаў і глядзеў, –
Стаць яшчэ страшней
Хацеў!

Малюнак Кацярыны Білан

Дэсанка МАКСІМАВІЧ

Зайцы-выхвалякі

У ляску зайцы спаткаліся,
Хто храбрэй з іх –
Выхваляліся.

Першы:
– Лапаю клянуся,
Што ваўка я –
Не баюся!

А другі:
– І я не струшу,
Уцякаць мядзведзя
Змушу!

– Чэснае капуснае, –
Трэці ўжо храбрыўся, –
Не баюся ні лісы,
Ні савы, ні рысі!

Раптам вецер наляцеў!
З хвоі шышкі ўпалі!
Смельчакоў бы здзьмула ўраз –
Пяткі паказалі!

З сербскай мовы пераклаў Мікола ЧАРНЯЎСКІ